سرو قد لالہ رخ و غنچہ دہن یاد آیا

سرو قد لالہ رخ و غنچہ دہن یاد آیا

پھر بہار آئی مجھے لطف چمن یاد آیا

گو کہ تھی سلطنت مصر مگر آخر کار

اس حکومت پہ بھی یوسف کو وطن یاد آیا

رگ گل پر ہے کبھی اور کبھی غنچہ پہ نگاہ

باغ میں کس کی کمر کس کا دہن یاد آیا

سفر ملک عدم کی ہوئی ایسی عجلت

زاد رہ کچھ نہ بجز گور و کفن یاد آیا

صحبت لالہ رخاں عہد شباب و شب وصل

مئے کہنہ جو ملی داغ کہن یاد آیا

جب سے آیا ہے نظر یہ ترا حسن بے داغ

کبک کو ماہ نہ بلبل کو چمن یاد آیا

تیرے سودائی کو پھر جوش ہوا وحشت کا

قیدیٔ زلف کو پھر طوق و رسن یاد آیا

پان کھا کر جو اگال آپ نے تھوکا صاحب

جوہری محو ہوے لعل یمن یاد آیا

بعد مدت کے طلب آپ نے بندہ کو کیا

شکر صد شکر میں اے مشفق من یاد آیا

فصل گل آتے ہی آغاؔ نے بھی وحشت کی لی

کیسی یہ چال چلا کس کا چلن یاد آیا

(1443) ووٹ وصول ہوئے

Your Thoughts and Comments

Sarw-qad Lala-ruKH O Ghuncha-dahan Yaad Aaya In Urdu By Famous Poet Aagha Akbarabadi. Sarw-qad Lala-ruKH O Ghuncha-dahan Yaad Aaya is written by Aagha Akbarabadi. Enjoy reading Sarw-qad Lala-ruKH O Ghuncha-dahan Yaad Aaya Poem on Inspiration for Students, Youth, Girls and Boys by Aagha Akbarabadi. Free Dowlonad Sarw-qad Lala-ruKH O Ghuncha-dahan Yaad Aaya by Aagha Akbarabadi in PDF.