Hawa Chali Hai Na Patta Koi Hila Ab Tak

hawa chali hai na patta koi hila ab tak

wahi hai ek KHamoshi ka silsila ab tak

wo kaun log hain kis ki talash mein gum hain

hamein to apna pata bhi nahin mila ab tak

tu apne chahne walon se aashna na hui

yahi to tujh se hai ai zist ek gila ab tak

kisi ka daman-e-sad-chaak kya rafu karte

ki hum se apna bhi daman nahin sila ab tak

wahi safar wahi tare wahi thakan baqi

wahi hai bujhte charaghon ka silsila ab tak

purani baat main kal ki samajh ke bhul gaya

magar hai zaKHm tamanna-e-dil khula ab tak

jise main DhunD raha hun gali gali 'anjum'

wo shaKHs mujh se bichhaD kar nahin mila ab tak