AaKHiri Dalil

tumhaari mohabbat

ab pahle se zyaada insaf chahti hai

subh barish ho rahi thi

jo tumhein udas kar deti hai

is manzar ko la-zawal banne ka haq tha

is khiDki ko sabze ki taraf kholte hue

tumhein ek muhasare mein aae dil ki yaad nahin aai

ek gum-nam pul par

tum ne apne aap se mazbut lahje mein kaha

mujhe akele rahna hai

mohabbat ko tum ne

hairat-zada kar dene wali KHush-qismati nahin samjha

meri qismat jahaz-rani ke kar-KHane mein nahin bani

phir bhi main ne samundar ke fasle tai kiye

pur-asrar taur par KHud ko zinda rakkha

aur be-rahmi se shairi ki

mere pas ek mohabbat karne wale ki

tamam KHamiyan

aur aaKHiri dalil hai