Kaun Shaer Rah Sakta Hai

lafz apni jagah se aage nikal jate hain

aur zindagi ka nizam toD dete hain

apne jaise lafzon ka gaTh bana lete hain

aur TuT jate hain

un ke TuTe hue kinaron par

nazmen marne lagti hain

lafz apni saKHt aur taqdir mein

kamzor ho jate hain

mamuli shikast un ko KHatm kar deti hai

un mein

TuT kar juD jaane se mohabbat nahin rah jati

in lafzon se

bad-surat aur be-tartib nazmen banne lagti hain

saffaki se kaT diye jaane ke baad

un ki jagah lene ko

ek aur khep aa jati hai

nazmon ko mar jaane se bachane ke liye

har roz un lafzon ko juda karna paDta hai

aur un jaise lafzon ke hamle se pahle

nae lafz phunchane paDte hain

jo aisa kar sakta hai

shaer rah sakta hai

(737) Peoples Rate This

Your Thoughts and Comments

Kaun Shaer Rah Sakta Hai In English By Famous Poet Afzal Ahmad Syed. Kaun Shaer Rah Sakta Hai is written by Afzal Ahmad Syed. Read famous Poem Kaun Shaer Rah Sakta Hai for youth and Student by Afzal Ahmad Syed. Free Download Kaun Shaer Rah Sakta Hai in PDF.