Nahaq O Haq Ka Unhen KHauf-o-KHatar Kuchh Bhi Nahin

nahaq o haq ka unhen KHauf-o-KHatar kuchh bhi nahin

be-KHabar hain wo zamane ki KHabar kuchh bhi nahin

dhum hi dhum thi madfan ki magar kuchh bhi nahin

KHak is ghar mein basar hogi ye ghar kuchh bhi nahin

hae afsos hui kaun si sohbat barKHast

shab ko mearaj mein the waqt-e-sahar kuchh bhi nahin

kah rahi hai ye mare dil se mohabbat us ki

hun to iksir magar mujh mein asar kuchh bhi nahin

aa rahi hai ye sada gor ke sannaTe se

main wo aalam hun jahan sham-o-sahar kuchh bhi nahin

is nazakat se to main kahe ko bismil hunga

tum chhuri pherte ho mujh ko KHabar kuchh bhi nahin

hatif-e-ishq to kahta hai idhar sab kuchh hai

aalam-e-yas ye kahta hai udhar kuchh bhi nahin

aankh phir jati hai mashuqon ki mayuson se

gham-zada kuchh nahin hasrat ki nazar kuchh bhi nahin

turbat-e-qais se kahti hai lipaT kar laila

hum taDapte hain paDe tum ko KHabar kuchh bhi nahin

manzil-e-gor mein kya jaaniye kya guzregi

taza warid hain abhi hum ko KHabar kuchh bhi nahin

lan-tarani ki jo takid hai ai dil ye khula

bab-e-didar mein manzur-e-nazar kuchh bhi nahin

KHwab dekha tha ki tha wasl ki shab ka saman

jashn tha raat ko hangam-e-sahar kuchh bhi nahin

us ko gahri ise ye ochhi chhuri wah ai yar

zaKHm-e-dil ghaw hua zaKHm-e-jigar kuchh bhi nahin

rishta-e-jaan se bhi nazuk hai wo bariki mein

gul ki rag phir hai gudaz us ki kamar kuchh bhi nahin

qabr mein huron ke aane ka uThaen kya lutf

dida o jism o dil o jaan o jigar kuchh bhi nahin

ras aa jaegi jis ko wo use chahenge

phir mohabbat mein sabhi kuchh hai agar kuchh bhi nahin

mutmain hun rah-e-isyan mein teri rahmat se

wo musafir hun ki tashwish-e-safar kuchh bhi nahin

ai 'sharaf' hai gul-e-maqsud ke har-su bauchhaar

wah ai KHubi-e-qismat ki idhar kuchh bhi nahin

(703) Peoples Rate This

Your Thoughts and Comments

Nahaq O Haq Ka Unhen KHauf-o-KHatar Kuchh Bhi Nahin In English By Famous Poet Agha Hajju Sharaf. Nahaq O Haq Ka Unhen KHauf-o-KHatar Kuchh Bhi Nahin is written by Agha Hajju Sharaf. Read famous Poem Nahaq O Haq Ka Unhen KHauf-o-KHatar Kuchh Bhi Nahin for youth and Student by Agha Hajju Sharaf. Free Download Nahaq O Haq Ka Unhen KHauf-o-KHatar Kuchh Bhi Nahin in PDF.