Rulwa Ke Mujhko Yar Gunahgar Kar Nahin

rulwa ke mujh ko yar gunahgar kar nahin

aankhen hain tar to hon mera daman to tar nahin

ummid-e-wasl se bhi to sadma na kam hua

kya dard jaega jo dawa ka asar nahin

din ko bhi dagh-e-dil ki na kam hogi raushni

ye lau hi aur hai ye charagh-e-sahar nahin

tanha chalen hain marka-e-ishq jhelne

un ki taraf KHudai hai koi idhar nahin

KHali safai-qalb se behtar hai dagh-e-ishq

kya aib hai ki jis ke muqabil hunar nahin

qatil ki rah dekh le dam bhar na zahr kha

ai dil qaza ko aane de be-maut mar nahin

kyunkar yahan na ek hi karwaT paDa rahun

hu ka maqam gor ki manzil hai ghar nahin

ran-khan paDenge jab kahin dikhlaega wo shakl

be-kisht-e-KHun hui ye muhim ho ke sar nahin

aankhen jhapak rahi hain meri barq-e-husn se

pesh-e-nazar ho tum mujhe tab-e-nazar nahin

yaro batao kis taraf aankhen bichhaun main

us shoKH ki kidhar ko hai aamad kidhar nahin

banda-nawaz sab hain ruku o sujud mein

taat se ghafil aap ki koi bashar nahin

pariyon ke pas jaun main kyun dil ko bechne

sauda jo mol lun ye mujhe dard-e-sar nahin

dard-e-firaq-e-yar se donon hain be-qarar

qabu mein dil nahin mutahammil jigar nahin

rah-e-adam mein sath rahegi teri hawas

parwa nahin na ho jo koi ham-safar nahin

KHalwat-sara-e-yar mein pahunchega kya koi

wo band-o-bast hai ki hawa ka guzar nahin

uThwa ke apni bazm se dil ko mere na toD

pahlu mein de ke ja mujhe barbaad kar nahin

hasti kidhar hai aalam-e-arwah hai kahan

ghaflat-zada hun mujh ko kahin ki KHabar nahin

zanjir utar gai tera diwana mar gaya

sannaTa qaid-KHane mein hai shor-o-shar nahin

chandra ke mujh ko bole wo aaKHir jo shab hui

faq ho gaya hai rang kisi ka sahar nahin

barpa hai hashr-o-nashr jo raftar-e-yar se

ye kaun sa chalan hai qayamat agar nahin

durr-e-najaf to jism hai us naznin ka

mu-e-najaf mein baal paDa hai kamar nahin

didar ka laga ke main aaya hun aasra

ummid-war hun mujhe mayus kar nahin

yaro sitam hua hui aaKHir shab-e-visal

sina 'sharaf' ye kuT rahe hain gajar nahin