Na Aae Kaam Kisi Ke Jo Zindagi Kya Hai

na aae kaam kisi ke jo zindagi kya hai

bashar-nawaz na ho jo wo aadmi kya hai

zamana-saz hain jo wo hain maslahat-andesh

jo ho KHulus se aari wo dosti kya hai

pas-az-wafat na len jis ka nam us ke aziz

tawangari hai agar ye to muflisi kya hai

karo na dast-daraazi KHuda ke bandon par

hai nam us ka shujaat to buzdili kya hai

haqiqi dosti wo hai ho jis mein josh-o-KHarosh

nashat-e-ruh na ho jis mein KHush-dili kya hai

aziz-tar hain mujhe KHud se bhi hasan-chishti

bataun aap ko kya banda-parwari kya hai

na ho jo qari-o-samea pe kuchh asar-andaz

fareb mahz hai 'barqi' wo shairi kya hai