گفتگو اچھی لگی ذوق نظر اچھا لگا

گفتگو اچھی لگی ذوق نظر اچھا لگا

مدتوں کے بعد کوئی ہم سفر اچھا لگا

دل کا دکھ جانا تو دل کا مسئلہ ہے پر ہمیں

اس کا ہنس دینا ہمارے حال پر اچھا لگا

ہر طرح کی بے سر و سامانیوں کے باوجود

آج وہ آیا تو مجھ کو اپنا گھر اچھا لگا

باغباں گلچیں کو چاہے جو کہے ہم کو تو پھول

شاخ سے بڑھ کر کف دل دار پر اچھا لگا

کوئی مقتل میں نہ پہنچا کون ظالم تھا جسے

تیغ قاتل سے زیادہ اپنا سر اچھا لگا

ہم بھی قائل ہیں وفا میں استواری کے مگر

کوئی پوچھے کون کس کو عمر بھر اچھا لگا

اپنی اپنی چاہتیں ہیں لوگ اب جو بھی کہیں

اک پری پیکر کو اک آشفتہ سر اچھا لگا

میرؔ کے مانند اکثر زیست کرتا تھا فرازؔ

تھا تو وہ دیوانہ سا شاعر مگر اچھا لگا

(868) ووٹ وصول ہوئے

Your Thoughts and Comments

Guftugu Achchhi Lagi Zauq-e-nazar Achchha Laga In Urdu By Famous Poet Ahmad Faraz. Guftugu Achchhi Lagi Zauq-e-nazar Achchha Laga is written by Ahmad Faraz. Enjoy reading Guftugu Achchhi Lagi Zauq-e-nazar Achchha Laga Poem on Inspiration for Students, Youth, Girls and Boys by Ahmad Faraz. Free Dowlonad Guftugu Achchhi Lagi Zauq-e-nazar Achchha Laga by Ahmad Faraz in PDF.