Gerwe KapDe Badan Par Hath Lohe Ke KaDe

gerwe kapDe badan par hath lohe ke kaDe

le malamat-dar sufi dar pe tere aa paDe

iKHtiyaraat-e-dayar-e-dahr hasil hon mujhe

mehr se sona-kashidon mah se chandi jhaDe

bhej de mujh ko jahan-e-hissiyat-o-lams mein

shor se uljhe samaat aankh se manzar laDe

surKH inTon ki gali tak jaen hum diwana-war

dafatan apni nigah us ke dariche par paDe

us taffun-gah sa ek aur sayyara bhi ho

peD marte hon jahan talab mein pani saDe

har masiha-e-zaman ko KHair-maqdam chahiye

taj ho kanTon ka sar par meKH hathon mein gaDe