Aansuon Ke Tufan Mein Bijliyan Dabi Rakhna
aansuon ke tufan mein bijliyan dabi rakhna
sard sard aahon mein garmiyan dabi rakhna
kaifiyat gham-e-dil ki ho ayan na chehre se
parda-e-tabassum mein talKHiyan dabi rakhna
kaun sunne wala hai be-hison ki duniya mein
apne gham ki sine mein dastan dabi rakhna
kis qadar anokha hai shewa ahl-e-duniya ka
miThi miThi baaton mein talKHiyan dabi rakhna
KHub hai tumhaara bhi ye kalam-e-fan 'aKHtar'
sada sada sheron mein shoKHiyan dabi rakhna
Akhtar Muslimi 
(576) Peoples Rate This