دل کی راہیں ڈھونڈنے جب ہم چلے

دل کی راہیں ڈھونڈنے جب ہم چلے

ہم سے آگے دیدۂ پر نم چلے

تیز جھونکا بھی ہے دل کو ناگوار

تم سے مس ہو کر ہوا کم کم چلے

تھی کبھی یوں قدر دل اس بزم میں

جیسے ہاتھوں ہاتھ جام جم چلے

ہائے وہ عارض اور اس پر چشم نم

گل پہ جیسے قطرۂ شبنم چلے

آمد سیلاب کا وقفہ تھا وہ

جس کو یہ جانا کہ آنسو تھم چلے

کہتے ہیں گردش میں ہیں سات آسماں

از سر نو قصۂ آدم چلے

کھل ہی جائے گی کبھی دل کی کلی

پھول برساتا ہوا موسم چلے

بے ستوں چھت کے تلے اس دھوپ میں

ڈھونڈنے کس کو یہ میرے غم چلے

کون جینے کے لیے مرتا رہے

لو، سنبھالو اپنی دنیا ہم چلے

کچھ تو ہو اہل نظر کو پاس درد

کچھ تو ذکر آبروئے غم چلے

کچھ ادھورے خواب آنکھوں میں لیے

ہم بھی اخترؔ درہم و برہم چلے

(827) ووٹ وصول ہوئے

Your Thoughts and Comments

Dil Ki Rahen DhunDne Jab Hum Chale In Urdu By Famous Poet Akhtar Saeed Khan. Dil Ki Rahen DhunDne Jab Hum Chale is written by Akhtar Saeed Khan. Enjoy reading Dil Ki Rahen DhunDne Jab Hum Chale Poem on Inspiration for Students, Youth, Girls and Boys by Akhtar Saeed Khan. Free Dowlonad Dil Ki Rahen DhunDne Jab Hum Chale by Akhtar Saeed Khan in PDF.