کسی گمان و یقین کی حد میں وہ شوخ پردہ نشیں نہیں ہے

کسی گمان و یقین کی حد میں وہ شوخ پردہ نشیں نہیں ہے

جہاں نہ سمجھو اسی جگہ ہے جہاں سمجھ لو وہیں نہیں ہے

تمہارا وعدہ ہے کیسا وعدہ کہ جس کا دل کو یقیں نہیں ہے

نگین بے نقش تو ہزاروں یہ نقش ہے اور نگیں نہیں ہے

تصوروں کے فریب اٹھا کر مشاہدہ وہم بن رہا ہے

نظر نے کھائے ہیں اتنے دھوکے کہ دیکھ کر بھی یقیں نہیں ہے

تلون اک جزر و مد ہے خود ہی تھپیڑوں میں آ پھنسی ہے کشتی

خبر ہے مدت کے ڈوبے دل کی کہ آج تک تہہ نشیں نہیں ہے

یہ کہتی ہے گردش زمانہ قدم تھمیں گے نہ اب کسی جا

ہے یہ بھی اک آسماں کا ٹکڑا تری گلی کی زمیں نہیں ہے

وفا کی حامی حمیت ان کی حریف امید غیرت ان کی

نگاہیں اقرار کر رہی ہیں زباں پہ لیکن نہیں نہیں ہے

ہوا جو اک دل کا داغ روشن تو ہو گئے کل چراغ روشن

خیال روشن دماغ روشن بس اب اندھیرا کہیں نہیں ہے

سرشک خونیں کا کل فسانہ لپیٹ رکھا ہے اک ورق میں

نچوڑنے پر لہو نہ ٹپکے تو آستیں آستیں نہیں ہے

ہماری ناکامیٔ وفا نے زمانے کی کھول دی ہیں آنکھیں

چراغ کب کا بجھا پڑا ہے مگر اندھیرا کہیں نہیں ہے

مجھی پہ کیا ہے نہیں ہے کس میں یہ بت تراشی یہ بت پرستی

اگر نہ حسن نظر سے دیکھو تو کوئی بھی پھر حسیں نہیں ہے

رہ اطاعت میں آرزوؔ نے قدم قدم پہ کئے ہیں سجدے

جو آپ کا نقش پا نہیں ہے وہ اس کا نقش جبیں نہیں ہے

(2271) ووٹ وصول ہوئے

Your Thoughts and Comments

Kisi Guman-o-yaqin Ki Had Mein Wo ShoKH-e-parda-nashin Nahin Hai In Urdu By Famous Poet Arzoo Lakhnavi. Kisi Guman-o-yaqin Ki Had Mein Wo ShoKH-e-parda-nashin Nahin Hai is written by Arzoo Lakhnavi. Enjoy reading Kisi Guman-o-yaqin Ki Had Mein Wo ShoKH-e-parda-nashin Nahin Hai Poem on Inspiration for Students, Youth, Girls and Boys by Arzoo Lakhnavi. Free Dowlonad Kisi Guman-o-yaqin Ki Had Mein Wo ShoKH-e-parda-nashin Nahin Hai by Arzoo Lakhnavi in PDF.