Har Ek Fankar Ne Jo Kuchh Bhi Likkha KHub-tar Likkha

har ek fankar ne jo kuchh bhi likkha KHub-tar likkha

hawa ne paniyon par paniyon ne ret par likkha

daraKHshan kitne lamhe kar gaya ek barg-e-jaan-rafta

shajar se gir ke us ne daeron mein kis qadar likkha

subuk se rang halke daere ubhre hue shoshe

kisi ne kitni fankari se is ke jism par likkha

main hun zulmat-guzin ye khel hai taqdir ka warna

siyahi se bhi main ne raushni ke nam par likkha

shafaq ka rang kitne walehana-pan se bikhra hai

zamin o aasman ne mil ke unwan-e-sahar likkha