Wo Ek Nazar Se Mujhe Be-asas Kar Dega

wo ek nazar se mujhe be-asas kar dega

mere yaqin ko mera qayas kar dega

main jab bhi us ki udasi se ub jaungi

to yun hansega ki mujh ko udas kar dega

mila ke mujh se nigahen wo meri nazron ke

zara si der mein KHali gilass kar dega

phir is tarah se rahega mere KHayalon mein

ki meri pyas ko dariya ki pyas kar dega

main us ki gard haTate hue bhi Darti hun

wo aaina hai mujhe KHud-shanas kar dega

main us ke samne uryan lagungi duniya ko

wo mere jism ko mera libas kar dega

wo mahtab-sifat sirf raushni hi nahin

mujhi ko raat ka manzar bhi KHas kar dega