Yaad

shab ki chadar oDh kar aai hai

lamhon ki mahakti dhul mein lipTi hui

meri jaanib dhire dhire baDh rahi hai

aur main apne bistar-e-KHashak-o-KHas par

nim-wa aankhon se dhundli raushni ko

der se takta hua

dam-ba-KHud hun jhilmilati soch mein khoya hua

wo qarib aati hai

meri sans mein shoale jagati hai

meri dhaDkan ki lai ko kar rahi hai tez-tar

aur mujhe bedar-tar hoshyar-tar

hath jab baDhte hain chhune ke liye

aur ho jati hain gahri chadar-e-shab ki tahen

aur chha jati hai sanwlae hue lamhon ki dhul

yaad ban jati hai ek mauhum bhul