نہ اس کا بھید یاری سے نہ عیاری سے ہاتھ آیا

نہ اس کا بھید یاری سے نہ عیاری سے ہاتھ آیا

خدا آگاہ ہے دل کی خبرداری سے ہاتھ آیا

نہ ہوں جن کے ٹھکانے ہوش وہ منزل کو کیا پہنچے

کہ رستہ ہاتھ آیا جس کی ہشیاری سے ہاتھ آیا

ہوا حق میں ہمارے کیوں ستم گر آسماں اتنا

کوئی پوچھے کہ ظالم کیا ستم گاری سے ہاتھ آیا

اگرچہ مال دنیا ہاتھ بھی آیا حریصوں کے

تو دیکھا ہم نے کس کس ذلت و خواری سے ہاتھ آیا

نہ کر ظالم دل آزاری جو یہ دل منظور ہے لینا

کسی کا دل جو ہاتھ آیا تو دل داری سے ہاتھ آیا

اگرچہ خاکساری کیمیا کا سہل نسخہ ہے

ولیکن ہاتھ آیا جس کے دشواری سے ہاتھ آیا

ہوئی ہرگز نہ تیرے چشم کے بیمار کو صحت

نہ جب تک زہر تیرے خط زنگاری سے ہاتھ آیا

کوئی یہ وحشیٔ رم دیدہ تیرے ہاتھ آیا تھا

پر اے صیادوش دل کی گرفتاری سے ہاتھ آیا

ظفرؔ جو دو جہاں میں گوہر مقصود تھا اپنا

جناب فخر دیں کی وہ مددگاری سے ہاتھ آیا

(928) ووٹ وصول ہوئے

Your Thoughts and Comments

Na Us Ka Bhed Yari Se Na Ayyari Se Hath Aaya In Urdu By Famous Poet Bahadur Shah Zafar. Na Us Ka Bhed Yari Se Na Ayyari Se Hath Aaya is written by Bahadur Shah Zafar. Enjoy reading Na Us Ka Bhed Yari Se Na Ayyari Se Hath Aaya Poem on Inspiration for Students, Youth, Girls and Boys by Bahadur Shah Zafar. Free Dowlonad Na Us Ka Bhed Yari Se Na Ayyari Se Hath Aaya by Bahadur Shah Zafar in PDF.