Did Ki Tamanna Mein Aankh Bhar Ke Roe The

did ki tamanna mein aankh bhar ke roe the

hum bhi ek chehre ko yaad kar ke roe the

samne to logon ke gham chhupa liye apne

aur jab hue tanha hum bikhar ke roe the

hum se in andheron ko kis liye shikayat hai

hum to KHud charaghon ki lau katar ke roe the

jab talak the kashti par KHud ko rok rakkha tha

sahilon pe aate hi hum utar ke roe the

aaine mein rota wo aks bhi hamara tha

jis ko dekh kar akasr hum biphar ke roe the

yaad hai abhi tak wo ek sham bachpan ki

jaane kya hua tha sab log ghar ke roe the

sahilon pe aati hai aaj bhi sada un ki

Dubne se kuchh pahle jo ubhar ke roe the

har taraf thi KHamoshi aur aisi KHamoshi

raat apne sae se hum bhi Dar ke roe the

tab pata chala hum ko zaKHm kitne gahre hain

dard ke nashebon mein jab utar ke roe the

hum ne apni aankhon se hadsa wo dekha tha

pattharon ki basti mein zaKHm sar ke roe the