کچھ نہ کچھ سلسلہ ہی بن جاتا

کچھ نہ کچھ سلسلہ ہی بن جاتا

ریت پر نقش پا ہی بن جاتا

کس نے کاغذ پہ لکھ دیا مجھ کو

اس سے بہتر صدا ہی بن جاتا

زندگی کی ردیف مشکل تھی

میں فقط قافیہ ہی بن جاتا

اشک کچھ دیر کو ہی تھم جاتے

کام بگڑا ہوا ہی بن جاتا

کشتیاں تو خدا چلاتا ہے

کاش میں ناخدا ہی بن جاتا

کیا ملا مجھ کو نیکیوں کا صلہ

اچھا ہوتا برا ہی بن جاتا

منزلوں کی کسے تمنا تھی

بھیڑ میں راستا ہی بن جاتا

اب تو بس یہ ہوا کی کوشش ہے

ایک بادل گھنا ہی بن جاتا

میں بھی چہرہ اگر ہٹا لیتا

آئنہ آئنا ہی بن جاتا

ہم ذرا اور صبر کر لیتے

درد شاید دوا ہی بن جاتا

ہم سے دیوانے گر نہیں ہوتے

شہر یہ حادثہ ہی بن جاتا