راز نہاں تھی زندگی راز نہاں ہے آج بھی

راز نہاں تھی زندگی راز نہاں ہے آج بھی

وہم و گماں میں تھی وہم و گماں ہے آج بھی

کل بھی نوائے آگہی قیمت سنگ و خشت تھی

نغمۂ امن و آشتی جنس گراں ہے آج بھی

دل سے تو روز و شب ہوئی لاکھ طرح کی گفتگو

تشنۂ گفتگو مگر اپنی زباں ہے آج بھی

خاک میں جذب ہو گیا تیرے شہید کا لہو

مطلع کائنات پر سرخ دھواں ہے آج بھی

عشق کو نیند آ گئی وقت پہ اوس پڑ گئی

اپنے جنوں کے دشت میں دھوپ جواں ہے آج بھی

وقت کی دسترس نہیں بزم گہہ خیال تک

رخ پہ غبار ہی سہی یاد جواں ہے آج بھی

کل بھی رخ حیات پر رنگ شگفتگی نہ تھا

صبح بہار زندگی شام خزاں ہے آج بھی

کل بھی زبان و نطق کو خوف سنان و سیف تھا

نقد و نظر کو دہشت تیر و کماں ہے آج بھی

درشنؔ تشنہ کام پر ایک نگاہ ساقیا

شعلہ بیاں یہ کل بھی تھا شعلہ بیاں ہے آج بھی

(1044) ووٹ وصول ہوئے

Your Thoughts and Comments

Raaz-e-nihan Thi Zindagi Raaz-e-nihan Hai Aaj Bhi In Urdu By Famous Poet Darshan Singh. Raaz-e-nihan Thi Zindagi Raaz-e-nihan Hai Aaj Bhi is written by Darshan Singh. Enjoy reading Raaz-e-nihan Thi Zindagi Raaz-e-nihan Hai Aaj Bhi Poem on Inspiration for Students, Youth, Girls and Boys by Darshan Singh. Free Dowlonad Raaz-e-nihan Thi Zindagi Raaz-e-nihan Hai Aaj Bhi by Darshan Singh in PDF.