یہ کس نے کہہ دیا آخر کہ چھپ چھپا کے پیو

یہ کس نے کہہ دیا آخر کہ چھپ چھپا کے پیو

یہ مے ہے مے اسے اوروں کو بھی پلا کے پیو

غم جہاں کو غم زیست کو بھلا کے پیو

حسین گیت محبت کے گنگنا کے پیو

چھٹے نہ دامن طاعت بھی وقت مے نوشی

پیو تو سجدۂ الفت میں سر جھکا کے پیو

بجھے بجھے سے ہوں ارماں تو کیا فروغ نشاط

جو سو گئے ہیں ستارے انہیں جگا کے پیو

غم حیات کا درماں ہیں عشق کے آنسو

اندھیری رات ہے یارو دیے جلا کے پیو

نصیب ہوگی بہر کیف مرضیٔ ساقی

ملے جو زہر بھی یارو تو مسکرا کے پیو

مرے خلوص پہ شیخ حرم بھی کہہ اٹھا

جو پی رہے ہو تو درشنؔ حرم میں آ کے پیو