غالبؔ کو برا کیوں کہو

کل ایک ناقد غالبؔ نے مجھ سے یہ پوچھا

کہ قدر غالبؔ مرحوم کا سبب کیا ہے

مجھے بتاؤ کہ دیوان حضرت غالبؔ

کلام پاک ہے انجیل ہے کہ گیتا ہے

سنا ہے شہر کراچی میں ایک صاحب ہیں

کلام ان کا بھی غالبؔ سے ملتا جلتا ہے

ہمارا دوست طفیلی بھی ہے بڑا شاعر

اگرچہ ایک بڑے آدمی کا چمچہ ہے

تو پھر یہ غالب مرحوم کی ہی برسی کیوں

مجھے بتاؤ کہ ان میں خصوصیت کیا ہے

نہ ذوقؔ کا ہے کہیں تذکرہ نہ مومنؔ کا

نہ ذکر میرؔ کہیں ہے نہ یوم سوداؔ ہے

یہ فیضؔ و ماہرؔ و جوشؔ و فراقؔ کچھ بھی کہیں

مری نظر میں تو غالبؔ سے ذوق اونچا ہے

مجھے تو میرتقی میرؔ سے ہے ایک لگاؤ

کہ میرؔ کچھ بھی سہی شاعری تو کرتا ہے

یہ رنگ لائی ہے غالبؔ کی پارٹی بندی

کہ آج سارے جہاں میں اسی کا چرچا ہے

یہ روس والے جو غالبؔ پہ جان دیتے ہیں

مرے خیال میں اس میں بھی کوئی گھپلا ہے

کہاں کے ایسے بڑے آرٹسٹ تھے غالبؔ

یہ چند اہل ادب کا پروپیگنڈہ ہے

انا نے مار دیا ورنہ شاعر اچھا تھا

نتیجہ یہ کہ جو ہونا تھا اس کا آدھا ہے

لکھی ہے ایک غزل کی ردیف ''ہونے تک''

کوئی بتائے کہ کیا یہ بھی سہو املا ہے

کبھی ہے محو حسینوں سے دھول دھپا میں

کبھی کسی کا وہ سوتے میں بوسہ لیتا ہے

جو کہہ رہے ہیں کہ غالبؔ ہے فلسفی شاعر

مجھے بتائیں کہ بوسہ میں فلسفہ کیا ہے

جہاں رقم کی توقع ہوئی قصیدہ کہا

تمہیں کہو کہ یہ معیار شاعری کیا ہے

شراب جام میں ہے اور جام ہاتھوں میں

مگر یہ رند بلا نوش پھر بھی پیاسا ہے

جو شاعری ہو تجمل حسین خاں کے لیے

وہ اک طرح کی خوشامد ہے شاعری کیا ہے

خطاب و خلعت و دربار کے لیے اس نے

نہ جانے کتنے امیروں پہ جال ڈالا ہے

سنا یہ ہے کہ وہ صوفی بھی تھا ولی بھی تھا

اب اس کے بعد تو پیغمبری کا درجہ ہے

کہا جو میں نے کہ پڑھیے تو پہلے غالبؔ کو

تو بولے خاک پڑھوں مدعا تو عنقا ہے

مجھے خبر ہے کہ غالبؔ کی زندگی کیا تھی

کہ میں نے حضرت غالبؔ کا فلم دیکھا ہے

سنی جو میں نے یہ تنقید تو سمجھ نہ سکا

کہ اس غریب کو غالبؔ سے دشمنی کیا ہے

سمجھ گیا کہ یہ بکواس بے سبب تو نہیں

دماغ کا کوئی پرزہ ضرور ڈھیلا ہے

بڑھی جو بات تو پھر میں نے اس کو سمجھایا

ادب میں حضرت غالبؔ کا مرتبہ کیا ہے

بتایا اس کو کہ وہ زندگی کا ہے شاعر

بہت قریب سے دنیا کو اس نے دیکھا ہے

عجب تضاد کی حامل ہے اس کی شخصیت

عجیب شخص ہے برباد ہو کے ہنستا ہے

چراغ صبح کی مانند زندگی اس کی

اک آسرا ہے اک ارماں ہے اک تمنا ہے

جو اس کو روکنا چاہو تو اور تیز بہے

عجیب موج رواں ہے عجیب دریا ہے

چپک رہا ہے بدن پر لہو سے پیراہن

رفو کی اس کو ضرورت ہے اور نہ پروا ہے

وہ لکھ رہا ہے حکایات خوں چکان جنون

جبھی تو اس کے قلم سے لہو ٹپکتا ہے

بس ایک لفظ کے پردہ میں داستاں کہنا

یہ فکر و فن کی بلندی اسی کا حصہ ہے

نہ کیوں ہوں آج وہ مشہور پوری دنیا میں

کہ اس کی فکر کا موضوع پوری دنیا ہے

پہنچ گیا ہے وہ اس منزل تفکر پر

جہاں دماغ بھی دل کی طرح دھڑکتا ہے

کبھی تو اس کا کوئی شعر سادہ و رنگیں

رخ بشر کی طرح کیفیت بدلتا ہے

یہ ہم نے مانا کہ کچھ خامیاں بھی تھیں اس میں

وہ خامیاں نہیں رکھتا یہ کس کا دعویٰ ہے

وہ آدمی تھا خطا آدمی کی ہے فطرت

یہ کیوں کہیں کہ وہ انساں نہیں فرشتہ ہے

جو چاہتے ہیں کہ فوق البشر بنا دیں اسے

ہمیں تو اس کے ان احباب سے بھی شکوہ ہے

ہزار لوگوں نے چاہا کہ اس کے ساتھ چلیں

مگر وہ پہلے بھی تنہا تھا اب بھی تنہا ہے

کبھی ولی کبھی واعظ کبھی خراباتی

سمجھ سکو تو سمجھ لو وہ اک معما ہے

اگر یہ سچ ہے کہ الفاظ روح رکھتے ہیں

تو یہ بھی سچ ہے وہ الفاظ کا مسیحا ہے

(1096) ووٹ وصول ہوئے

Your Thoughts and Comments

Ghaalib Ko Bura Kyun Kaho In Urdu By Famous Poet Dilawar Figar. Ghaalib Ko Bura Kyun Kaho is written by Dilawar Figar. Enjoy reading Ghaalib Ko Bura Kyun Kaho Poem on Inspiration for Students, Youth, Girls and Boys by Dilawar Figar. Free Dowlonad Ghaalib Ko Bura Kyun Kaho by Dilawar Figar in PDF.