Kirdar

zindagi ke naTak mein

ek adakara hun main

ye hoga alamiya ya razmiya

kaun bata sakta hai

jab parda uThta hai

mujhe apna kirdar ada karna hota hai

kuchh soche-samjhe baghair

dusre adakaron ke ishaaron par

bolne paDte hain apne mukalme

mere kirdar hain be-shumar

muKHtalif jazbaat liye

madad karne ke liye mujhe

pas-e-parda koi nahin hai

kya main ne apna kirdar sahih nibhaya

jo kahna tha sahi kaha sahi Dhang se

kya main na-kaamyab thi

kya samain ki taliyan

aur naqqadon ki dad main ne hasil ki

ya phir sab ki nazron mein gir gai

in sawalat ka waqt hi jawab dega

parda girne ke baad