Tez Hai Mera Qalam Talwar Se
tez hai mera qalam talwar se
dost KHaif hain meri raftar se
jeb mein kuchh bhi nahin tha is liye
lauT kar main aa gaya bazar se
jholiyan bhar bhar ke jate hain sabhi
nausha-e-lajpal ke darbar se
phir rasai mein nahin rah paya wo
chand upar ho gaya diwar se
aap ghusse mein rahen aur mere dost
luT kar sab le gae hain pyar se
ek dil TuTa hua hai ek main
aur kuchh jazbaat hain be-kar se
thoDa thoDa KHud se main KHaif raha
thoDa thoDa ghaib ke asrar se
(9543) Peoples Rate This