رنگ پیراہن کا خوشبو زلف لہرانے کا نام

رنگ پیراہن کا خوشبو زلف لہرانے کا نام

موسم گل ہے تمہارے بام پر آنے کا نام

دوستو اس چشم و لب کی کچھ کہو جس کے بغیر

گلستاں کی بات رنگیں ہے نہ مے خانے کا نام

پھر نظر میں پھول مہکے دل میں پھر شمعیں جلیں

پھر تصور نے لیا اس بزم میں جانے کا نام

دلبری ٹھہرا زبان خلق کھلوانے کا نام

اب نہیں لیتے پری رو زلف بکھرانے کا نام

اب کسی لیلیٰ کو بھی اقرار محبوبی نہیں

ان دنوں بدنام ہے ہر ایک دیوانے کا نام

محتسب کی خیر اونچا ہے اسی کے فیض سے

رند کا ساقی کا مے کا خم کا پیمانے کا نام

ہم سے کہتے ہیں چمن والے غریبان چمن

تم کوئی اچھا سا رکھ لو اپنے ویرانے کا نام

فیضؔ ان کو ہے تقاضائے وفا ہم سے جنہیں

آشنا کے نام سے پیارا ہے بیگانے کا نام

(3016) ووٹ وصول ہوئے

Your Thoughts and Comments

Rang Pairahan Ka KHushbu Zulf Lahrane Ka Nam In Urdu By Famous Poet Faiz Ahmad Faiz. Rang Pairahan Ka KHushbu Zulf Lahrane Ka Nam is written by Faiz Ahmad Faiz. Enjoy reading Rang Pairahan Ka KHushbu Zulf Lahrane Ka Nam Poem on Inspiration for Students, Youth, Girls and Boys by Faiz Ahmad Faiz. Free Dowlonad Rang Pairahan Ka KHushbu Zulf Lahrane Ka Nam by Faiz Ahmad Faiz in PDF.