دل دار دیکھنا

طوفاں بہ دل ہے ہر کوئی دل دار دیکھنا

گل ہو نہ جائے مشعل رخسار دیکھنا

آتش بہ جاں ہے ہر کوئی سرکار دیکھنا

لو دے اٹھے نہ طرۂ طرار دیکھنا

جذب مسافران رہ یار دیکھنا

سر دیکھنا، نہ سنگ، نہ دیوار دیکھنا

کوئے جفا میں قحط خریدار دیکھنا

ہم آ گئے تو گرمئ بازار دیکھنا

اس دل نواز شہر کے اطوار دیکھنا

بے التفات بولنا، بیزار دیکھنا

خالی ہیں گرچہ مسند و منبر، نگوں ہے خلق

رعب قبا و ہیبت دستار دیکھنا

جب تک نصیب تھا ترا دیدار دیکھنا

جس سمت دیکھنا، گل و گلزار دیکھنا

پھر ہم تمیز روز و مہ و سال کر سکیں

اے یاد یار پھر ادھر اک بار دیکھنا