تہ نجوم

تہ نجوم، کہیں چاندنی کے دامن میں

ہجوم شوق سے اک دل ہے بے قرار ابھی

خمار خواب سے لبریز احمریں آنکھیں

سفید رخ پہ پریشان عنبریں آنکھیں

چھلک رہی ہے جوانی ہر اک بن مو سے

رواں ہو برگ گل تر سے جیسے سیل شمیم

ضیا مہ میں دمکتا ہے رنگ پیراہن

ادائے عجز سے آنچل اڑا رہی ہے نسیم

دراز قد کی لچک سے گداز پیدا ہے

ادائے ناز سے رنگ نیاز پیدا ہے

اداس آنکھوں میں خاموش التجائیں ہیں

دل حزیں میں کئی جاں بلب دعائیں ہیں

تہ نجوم کہیں چاندنی کے دامن میں

کسی کا حسن ہے مصروف انتظار ابھی

کہیں خیال کے آباد کردہ گلشن میں

ہے ایک گل کہ ہے نا واقف بہار ابھی