زندگی

ملکۂ شہر زندگی تیرا

شکر کس طور سے ادا کیجے

دولت دل کا کچھ شمار نہیں

تنگ دستی کا کیا گلہ کیجے

جو ترے حسن کے فقیر ہوئے

ان کو تشویش روزگار کہاں؟

درد بیچیں گے گیت گائیں گے

اس سے خوش بخت کاروبار کہاں؟

جام چھلکا تو جم گئی محفل

منت لطف غم گسار کسے؟

اشک ٹپکا تو کھل گیا گلشن

رنج کم ظرفیٔ بہار کسے؟

خوش نشیں ہیں کہ چشم و دل کی مراد

دیر میں ہے نہ خانقاہ میں ہے

ہم کہاں قسمت آزمانے جائیں

ہر صنم اپنی بارگاہ میں ہے

کون ایسا غنی ہے جس سے کوئی

نقد شمس و قمر کی بات کرے

جس کو شوق نبرد ہو ہم سے

جائے تسخیر کائنات کرے

(3013) ووٹ وصول ہوئے

Your Thoughts and Comments

Zindagi In Urdu By Famous Poet Faiz Ahmad Faiz. Zindagi is written by Faiz Ahmad Faiz. Enjoy reading Zindagi Poem on Inspiration for Students, Youth, Girls and Boys by Faiz Ahmad Faiz. Free Dowlonad Zindagi by Faiz Ahmad Faiz in PDF.