دل سلسلۂ شوق کی تشہیر بھی چاہے

دل سلسلۂ شوق کی تشہیر بھی چاہے

زنجیر بھی آوازۂ زنجیر بھی چاہے

آرام کی صورت نظر آئے تو کچھ انساں

نیرنگ شب و روز میں تغییر بھی چاہے

لازم ہے محبت سے محبت ہی جنم لے

تصویر جو دیکھے اسے تصویر بھی چاہے

لہجہ تو بدل چبھتی ہوئی بات سے پہلے

تیر ایسا تو کچھ ہو جسے نخچیر بھی چاہے

اک پل میں بدلتے ہیں خد و خال ہیولے

آنکھ اپنے کسی خواب کی تعبیر بھی چاہے

تاثیر سے خالی تو سخن ننگ ہے گوہرؔ

شاعر کو عطا ہو سند میرؔ بھی چاہے