Dekh Kar Wahshat Nigahon Ki Zaban Bechain Hai

dekh kar wahshat nigahon ki zaban bechain hai

phir sulagne ko koi ek dastan bechain hai

kali raaton ke saliqe din ko kyun bhane lage

soch kar gum-sum hai dharti aasman bechain hai

kaghazon par ho gae sare KHulase hi magar

kuchh to hai jo hashiyon ke darmiyan bechain hai

jab se sazish mein samundar ki hawa shamil hui

kashti hai chup-chap si aur baadban bechain hai

bhed jab sargoshiyon ka khul ke aaya samne

shor wo uTTha hai apna hukmaran bechain hai

hijr ke mausam ki kuchh mat puchhiye uf dastan

main yahan betab hun to wo wahan bechain hai