بلبل کو خار خار دبستاں ہے ان دنوں

بلبل کو خار خار دبستاں ہے ان دنوں

ہر طفل کی بغل میں گلستاں ہے ان دنوں

زنار عشق بت میں رگ جاں ہے ان دنوں

ناقوس برہمن دل نالاں ہے ان دنوں

آباد میرا خانۂ ویراں ہے ان دنوں

سیلاب مجھ غریب کا مہماں ہے ان دنوں

دامن ہے اپنے ہاتھ میں اک رشک ماہ کا

پیش نظر ہلال گریباں ہے ان دنوں

باغ جہاں میں جو ہے گرفتار ہے ترا

آزاد ایک سرو گلستاں ہے ان دنوں

کہتے ہیں ہم زمین میں مجنوں کی اب غزل

ہر بیت اپنی خانۂ زنداں ہے ان دنوں

کافر ہو اے صنم جو خریدے نہ تو اسے

مہندی کے مول خون مسلماں ہے ان دنوں

ہنگامہ حسن و عشق کا ہے گرم آج کل بہت

دیوانہ پری ہے جو انساں ہے ان دنوں

مستی کا ان لبوں کے فسانہ کہاں نہیں

مجلس نہیں وہ جو نہیں حیراں ہے ان دنوں

صدقے چکور ہوتے ہیں رخسار یار کے

وہ ماہ چار دہ مہ تاباں ہے ان دنوں

آتا ہے سیر باغ کو وہ گوہر مراد

پھیلائے گل کے پاس جو داماں ہے ان دنوں

قد سرو چہرہ گل ہے تو سنبل ہیں موئے یار

گھر خانہ باغ ہے جو وہ مہماں ہے ان دنوں

جوہر شناس جمع ہیں آتشؔ ہے معرکہ

شمشیر ہے وہی کہ جو عریاں ہے ان دنوں

(760) ووٹ وصول ہوئے

Your Thoughts and Comments

Bulbul Ko Khaar Khaar-e-dabistan Hai In Dinon In Urdu By Famous Poet Haidar Ali Aatish. Bulbul Ko Khaar Khaar-e-dabistan Hai In Dinon is written by Haidar Ali Aatish. Enjoy reading Bulbul Ko Khaar Khaar-e-dabistan Hai In Dinon Poem on Inspiration for Students, Youth, Girls and Boys by Haidar Ali Aatish. Free Dowlonad Bulbul Ko Khaar Khaar-e-dabistan Hai In Dinon by Haidar Ali Aatish in PDF.