ہم تیرگی میں شمع جلائے ہوئے تو ہیں

ہم تیرگی میں شمع جلائے ہوئے تو ہیں

ہاتھوں میں سرخ جام اٹھائے ہوئے تو ہیں

اس جان انجمن کے لئے بیقرار دل

آنکھوں میں انتظار سجائے ہوئے تو ہیں

میلاد ہو کہ مجلس غم مبتلا ترے

آنگن میں دل کے فرش بچھائے ہوئے تو ہیں

ضرب حرم نے شوق جنوں کو بڑھا دیا

سینے سے ہم بتوں کو لگائے ہوئے تو ہیں

دنیا کہاں تھی پاس وراثت کے ضمن میں

اک دین تھا سو اس پہ لٹائے ہوئے تو ہیں

کب چوب دار پر ہوں سرافراز دیکھیے

اس شوخ کی نگاہ میں آئے ہوئے تو ہیں