دل کی طرف نگاہ تغافل رہا کرے

دل کی طرف نگاہ تغافل رہا کرے

اس خاک راہ کو بھی کوئی کیمیا کرے

ہیرے کی کان دیکھ کے آتا ہے یہ خیال

کاش اس زمیں سے دانۂ گندم اگا کرے

ٹوٹے کسی طرح تو دھوئیں کا سیہ طلسم

ہر شام اس دیار میں آندھی چلا کرے

دھیمے دکھوں کی راکھ بدن پر ملی تو ہے

وہ ڈال دے نظر تو مجھے آئنا کرے

خوشبو مرے غموں کی بکھر جائے دور دور

یوں چپ رہوں کہ ایک زمانہ سنا کرے

بجھنے لگی ہے شام کے آنگن میں روشنی

اب موج خون دل ہی کوئی معجزہ کرے