Sitam Tir-e-nigah-e-dilruba Tha

sitam tir-e-nigah-e-dilruba tha

hamare haq mein paigham-e-qaza tha

hua achchha ki wo ghar se na nikle

kise malum kis ke dil mein kya tha

mujhe wo yaad karte hain ye kah kar

KHuda baKHshe nihayat ba-wafa tha

ummid-e-wasl ki haalat na puchho

faqat ek aasra hi aasra tha

bahut achchha hua wo le gae dil

baDa ziddi nihayat bewafa tha

nahin malum us kam-sin ko ye bhi

hamare dil mein kya hai aur kya tha

na puchho jalwa-gah-e-naz ka jamal

har ek mahw-e-jamal-e-dilruba tha

suna hai mai-kashi karne laga 'hijr'

wo mard-e-ba-KHuda to parsa tha