Jo Baat Tujhse Chahi Hai Apna Mizaj Aaj

jo baat tujh se chahi hai apna mizaj aaj

qurban teri kal pe na Tal aaj aaj aaj

dahki hai aag dil mein paDe ishtiyaq ki

tere siwae kis se ho is ka ilaj aaj

hai fauj fauj-e-ghamza-o-andaz tere sath

aqlim-e-naz ka hai tujhe taKHt-o-taj aaj

tera wo husn hai ki jo hota to bhejta

yusuf zamin-e-misr se tujh ko KHiraj aaj

KHuban-e-rozgar muqallid tere hain sab

jo chiz tu kare so wo pawe riwaj aaj

aab-e-zulal-e-wasl se andoh-e-dard-o-hijr

napaid ghul ke hota hai kya misl-e-zaj aaj

'insha' se apne aur ye inkar haif hai

laya hai wo kabhi na kabhi ehtiyaj aaj