Miyan Chashm-e-jadu Pe Itna GhamanD
miyan chashm-e-jadu pe itna ghamanD
KHat-o-KHal o gesu pe itna ghamanD
aji sar uTha kar idhar dekhna
isi chashm o abru pe itna ghamanD
nasim-e-gul is zulf mein ho to aa
na kar apni KHushbu pe itna ghamanD
shab-e-mah mein kahta hai wo mah se
rakabi se is ru pe itna ghamanD
bas ai shama kar fikr apni zara
inhi chaar aansu pe itna ghamanD
akaDta hai kya dekh dekh aaina
hasin garche hai tu pa itna ghamanD
wo kar panja 'insha' se bole ki wah
isi zor-e-bazu pe itna ghamanD
Insha Allah Khan 'Insha' 
(743) Peoples Rate This