TukDe TukDe Mera Daman-e-shakebai Hai

TukDe TukDe mera daman-e-shakebai hai

kis qadar sabr-shikan aap ki angDai hai

dil ne jazbaat-e-mohabbat se ziya pai hai

meri tanhai bhi ek anjuman-arai hai

ab jafa se bhi gurezan hain wo allah allah

dekhiye kya mera anjam-e-shakebai hai

bijliyan mere qafas par na kahin TuT paDen

kyun saba KHak nasheman ki yahan lai hai

bas wahi bahr-e-mohabbat ka shanawar nikla

jis ne tufan se ulajhne ki qasam khai hai

shauq se aap zamane ko nawazen lekin

kya koi meri tarah aap ka shaidai hai

kaun hamdard zamane mein hai 'iqbaal' magar

un ki ek yaad faqat monis-e-tanhai hai