اتنا تو جانتے ہیں کہ بندے خدا کے ہیں

اتنا تو جانتے ہیں کہ بندے خدا کے ہیں

آگے حواس گم خرد نارسا کے ہیں

ممنون برگ گل ہیں نہ شرمندۂ صبا

ہم بلبل اور ہی چمن دل کشا کے ہیں

کیا کوہ کن کی کوہ کنی کیا جنون قیس

وادیٔ عشق میں یہ مقام ابتدا کے ہیں

بنیان عمر سست ہے اور منعمان دہر

مغرور اپنے کو شک عالی بنا کے ہیں

اپنے وجود کا ابھی عقدہ کھلا نہیں

مصروف حل و عقد میں ارض و سما کے ہیں

شیخ اور برہمن میں اگر لاگ ہے تو ہو

دونوں شکار غمزہ اسی دل ربا کے ہیں

جن کو عنایت ازلی سے ہے چشم داشت

وہ معتقد دعا کے نہ قائل دوا کے ہیں

لایا نہیں ہنوز نوید‌ وصال دوست

ہم شکوہ سنج سستی‌‌ پیک سبا کے ہیں

سمجھو اگر تو ہیں وہی سب سے حریص تر

طالب خدا سے جو دل بے مدعا کے ہیں

ان بد‌ دلوں نے عشق کو بد نام کر دیا

جو مرتکب شکایت‌ جور و جفا کے ہیں

ہمت ہمائے اوج سعادت ہے مرد کو

الو ہیں وہ جو شیفتہ ظل ہما کے ہیں

ہے اشک و آہ راس ہمارے مزاج کو

یعنی پلے ہوئے اسی آب و ہوا کے ہیں

جو باندھتے ہیں طرۂ طرار کا خیال

ناداں امیدوار نزول بلا کے ہیں

کھٹکا بھی کچھ ہوا نہیں اور دل اڑا لیا

یہ سارے ہتکھنڈے تری زلف دوتا کے ہیں

صید کرشمہ اس لئے ہوتے نہیں کہ ہم

پہلے سے زخم خوردہ فریب وفا کے ہیں

مارا بھی اور مار کے زندہ بھی کر دیا

یہ شعبدے تو شوخیٔ ناز و ادا کے ہیں

خلوت میں بھی روا نہیں گستاخیٔ نگاہ

پردے پڑے ہوئے ابھی شرم و حیا کے ہیں

یوں کہہ رہی ہے نرگس بیمار کی ادا

نسخے تو مجھ کو یاد ہزاروں شفا کے ہیں

اب تک ہے سجدہ گاہ عزیزان روزگار

جس خاک پر نشان ترے کفش پا کے ہیں

اندیشہ ہے کہ دے نہ ادھر کی ادھر لگا

مجھ کو تو نا پسند وتیرے صبا کے ہیں

سیر ورود قافلۂ نو بہار دیکھ

برپا خیام اوج ہوا میں گھٹا کے ہیں

جاتا ہے خاک‌ پاک دکن کو یہ ریختہ

واں قدردان اس گہر بے بہا کے ہیں

احباب کا کرم ہے اگر نکتہ چیں نہ ہوں

ورنہ ہم آپ معترف اپنی خطا کے ہیں

(1087) ووٹ وصول ہوئے

Your Thoughts and Comments

Itna To Jaante Hain Ki Bande KHuda Ke Hain In Urdu By Famous Poet Ismail Merathi. Itna To Jaante Hain Ki Bande KHuda Ke Hain is written by Ismail Merathi. Enjoy reading Itna To Jaante Hain Ki Bande KHuda Ke Hain Poem on Inspiration for Students, Youth, Girls and Boys by Ismail Merathi. Free Dowlonad Itna To Jaante Hain Ki Bande KHuda Ke Hain by Ismail Merathi in PDF.