Raste Zist Ke Dushwar Nazar Aate Hain
raste zist ke dushwar nazar aate hain
log ulfat se bhi bezar nazar aate hain
jis ko dekho wo KHaridar hua hai un ka
har taraf misr ke bazar nazar aate hain
bal hai abru pe nazar tez KHuda KHair kare
aaj kuchh hashr ke aasar nazar aate hain
manzil-e-ishq ki rahen hain bahut hi dushwar
har qadam par nae aazar nazar aate hain
kya kahun ek tere jalwe ke muqabil ai dost
chashm-o-dil donon hi bekar nazar aate hain
yaad aa jate hain wo jab bhi hamein ai 'jauhar'
har taraf matla-e-anwar nazar aate hain
Jauhar Zahiri 
(847) Peoples Rate This