Tishnagi Ne Sarab Hi Likkha

tishnagi ne sarab hi likkha

KHwab dekha tha KHwab hi likkha

hum ne likkha nisab-e-tira-shabi

aur ba-sad aab-o-tab hi likkha

munshiyan-e-shuhud ne ta-haal

zikr-e-ghaib-o-hijab hi likkha

na rakha hum ne besh-o-kam ka KHayal

shauq ko be-hisab hi likkha

dosto hum ne apna haal use

jab bhi likkha KHarab hi likkha

na likha us ne koi bhi maktub

phir bhi hum ne jawab hi likkha

hum ne is shahr-e-din-o-daulat mein

masKHaron ko janab hi likkha