مثل آئینہ با صفا ہیں ہم

مثل آئینہ با صفا ہیں ہم

دیکھنے ہی کے آشنا ہیں ہم

نہیں دونوں جہاں سے کام ہمیں

اک فقط تیرے مبتلا ہیں ہم

دیکھ سائے کی طرح اے پیارے

ساتھ تیرے ہیں اور جدا ہیں ہم

ٹک تو کر رحم اے بت بے رحم

آخرش بندۂ خدا ہیں ہم

ظلم پر اور ظلم کرتے ہو

اس قدر قابل جفا ہیں ہم

جوں صبا نام کو تو ہیں ہم لوگ

لیک دیکھا تو جا بہ جا ہیں ہم

زلفیں کہتی ہیں اس کی، عاشق کے

مار لینے کو تو بلا ہیں ہم

جب سے پیدا ہوئے ہیں جوں افلاک

آہ گردش ہی میں سدا ہیں ہم

ہم بھی کچھ چیز ہیں میاں لیکن

یہ نہیں جانتے کہ کیا ہیں ہم

شعلۂ ناتوان کی مانند

ہاتھ میں تیرے اے صبا ہیں ہم

گر یہی ہے ہوا یہاں کی تو آہ

اب کوئی آن میں ہوا ہیں ہم

تو جو کہتا ہے ہر گھڑی تیرے

دیکھنے سے بہت خفا ہیں ہم

کیا کریں یار تو ہی کر انصاف

تجھ پہ مائل نہیں ہیں یا ہیں ہم

دل کے ہاتھوں سے اے میاں جرأتؔ

زندگانی سے بھی خفا ہیں ہم

(1090) ووٹ وصول ہوئے

Your Thoughts and Comments

Misl-e-aina Ba-safa Hain Hum In Urdu By Famous Poet Jurat Qalandar Bakhsh. Misl-e-aina Ba-safa Hain Hum is written by Jurat Qalandar Bakhsh. Enjoy reading Misl-e-aina Ba-safa Hain Hum Poem on Inspiration for Students, Youth, Girls and Boys by Jurat Qalandar Bakhsh. Free Dowlonad Misl-e-aina Ba-safa Hain Hum by Jurat Qalandar Bakhsh in PDF.