Ye Hadisa To Hua Hi Nahin Hai Tere Baad

ye hadisa to hua hi nahin hai tere baad

ghazal kisi ko kaha hi nahin hai tere baad

hai pur-sukun samundar kuchh is tarah dil ka

ki jaise chand khila hi nahin hai tere baad

mahakti raat se dil se qalam se kaghaz se

kisi se rabt rakha hi nahin hai tere baad

KHayal KHwab fasane kahaniyan thin magar

wo KHat tujhe bhi likha hi nahin hai tere baad

kahan se mahkegi honTon pe lams ki KHushbu

kisi ko main ne chhua hi nahin hai tere baad

charagh palkon pe 'azar' kisi ki yaadon ka

qasam KHuda ki jala hi nahin hai tere baad