Fareb

har ek sham mujhe yun KHayal aata hai

ki jaise TaT ka maila phaTa hua parda

tumhaare hath ki jumbish se kanp jaega

ki jaise tum abhi daftar se lauT aaoge

mujhe to yaad nahin kuchh tumhaare sar ki qasam

magar paDos ki laDki bata rahi thi ki main

ab apni mang mein afshan nahin sajati hun

tawe pe roTiyan akasr jalai hain main ne

shakar ke badle namak chae mein milati hun

wo kah rahi thi ki nangi kalaiyan meri

tamam umr yunhi chuDiyon ko tarsengi

ghamon ki dhup mein jalte hue is aangan par

masarraton ki ghaTaen kabhi na barsengi

wo kah rahi thi ki tum ab kabhi na aaoge

gali ke moD pe lekin har ek sham mujhe

tumhaare qadmon ki aahaT sunai deti hai

har ek sham mujhe yun KHayal aata hai

ki jaise tum abhi daftar se lauT aaoge