Aaj Phir ShaKH Se Gire Patte
aaj phir shaKH se gire patte
aur miTTi mein mil gae patte
jaane kis dasht ki talash mein hain
regzaron mein chiKHte patte
kal jinhen aasman pe dekha tha
aaj patal mein mile patte
apni aawaz hi se KHauf-zada
shaKH-dar-shaKH kanpte patte
mujh ko ek barg-e-KHushk bhi na mila
ab kahan bagh mein hare patte
sare gulshan ko de gae sona
aur KHud KHak ban gae patte
'kaif' virani-e-gulistan bhi
baz auqat le uDe patte
Kaif Ahmed Siddiqui 
(776) Peoples Rate This