Hum Aaj Kuchh Hasin Sarabon Mein Kho Gae

hum aaj kuchh hasin sarabon mein kho gae

aankhen khulin to jagte KHwabon mein kho gae

hum safha-e-hayat se jab be-nishan hue

lafzon ki ruh ban ke kitabon mein kho gae

aaina-e-bahaar ke kuchh aks-e-muzmahil

KHushbu ka rang pa ke gulabon mein kho gae

dar-asl barshgal ke tum aaftab the

barsat jab hui to sahabon mein kho gae

nikle the jo bhi aaj talash-e-sawab mein

wo zindagi ke saKHt azabon mein kho gae

dil ko thi ek shahr-e-tamanna ki justuju

lekin hum aarzu ke KHarabon mein kho gae

jab masala hayat ka kuchh hal na ho saka

hum 'kaif' falsafe ki kitabon mein kho gae