Jo Sada Gunjti Thi Kanon Mein
jo sada gunjti thi kanon mein
munjamid ho gai zabanon mein
lamha lamha pighal rahi hai hayat
KHwab ki yaKH-zada chaTanon mein
kitne jazbaat ho gae aahan
un mashinon ke kar-KHanon mein
shahd ka ghunT ban gaya hoga
zaiqa zahr ka zabanon mein
KHamushi bhut ban ke rahti hai
aaj insan ke makanon mein
ek hasin phul ban ke girti hai
barq bhi mere aashiyanon mein
fan ko nilam kar diya aaKHir
'kaif' logon ne chand aanon mein
Kaif Ahmed Siddiqui 
(576) Peoples Rate This