تیرا خیال تیری تمنا تک آ گیا

تیرا خیال تیری تمنا تک آ گیا

میں دل کو ڈھونڈھتا ہوا دنیا تک آ گیا

کیا اتنا بڑھ گیا مری تشنہ لبی کا شور

سیلاب دیکھنے مجھے صحرا تک آ گیا

لیکن خزاں کی نذر کیا آخری گلاب

ہر چند اس میں مجھ کو پسینہ تک آ گیا

آگے رہ فراق میں آنا ہے اور کیا

آنکھوں کے آگے آج اندھیرا تک آ گیا

کیا ارتقا پذیر ہے انسان کا ضمیر

رشتوں کو چھوڑ چھاڑ کے اشیا تک آ گیا

لیکن کسی دریچے سے جھانکا نہ کوئی رات

سن کر مری پکار ستارہ تک آ گیا

کاشفؔ حسین یار اٹھو اب تو چل پڑو

چل کر تمہارے پاؤں میں رستہ تک آ گیا