ہر قدم دورئ منزل ہے نمایاں مجھ سے

ہر قدم دورئ منزل ہے نمایاں مجھ سے

میری رفتار سے بھاگے ہے بیاباں مجھ سے

درس عنوان تماشا بہ تغافل خوشتر

ہے نگہ رشتۂ شیرازۂ مژگاں مجھ سے

وحشت آتش دل سے شب تنہائی میں

صورت دود رہا سایہ گریزاں مجھ سے

غم عشاق نہ ہو سادگی آموز بتاں

کس قدر خانۂ آئینہ ہے ویراں مجھ سے

اثر آبلہ سے جادۂ صحرائے جنوں

صورت رشتۂ گوہر ہے چراغاں مجھ سے

بے خودی بستر تمہید فراغت ہو جو

پر ہے سائے کی طرح میرا شبستاں مجھ سے

شوق دیدار میں گر تو مجھے گردن مارے

ہو نگہ مثل گل شمع پریشاں مجھ سے

بیکسی ہائے شب ہجر کی وحشت ہے ہے

سایہ خورشید قیامت میں ہے پنہاں مجھ سے

گردش ساغر صد جلوۂ رنگیں تجھ سے

آئنہ داری یک دیدۂ حیراں مجھ سے

نگہ گرم سے ایک آگ ٹپکتی ہے اسدؔ

ہے چراغاں خس و خاشاک گلستاں مجھ سے

بستن عہد محبت ہمہ نادانی تھا

چشم نکشودہ رہا عقدۂ پیماں مجھ سے

آتش افروزی یک شعلۂ ایما تجھ سے

چشمک آرائی صد شہر چراغاں مجھ سے

(1689) ووٹ وصول ہوئے

Your Thoughts and Comments

Har Qadam Duri-e-manzil Hai Numayan Mujhse In Urdu By Famous Poet Mirza Ghalib. Har Qadam Duri-e-manzil Hai Numayan Mujhse is written by Mirza Ghalib. Enjoy reading Har Qadam Duri-e-manzil Hai Numayan Mujhse Poem on Inspiration for Students, Youth, Girls and Boys by Mirza Ghalib. Free Dowlonad Har Qadam Duri-e-manzil Hai Numayan Mujhse by Mirza Ghalib in PDF.