Shama

aaj us dil-ruba ki sal girah hai

lekin main us hasin sham ka intizar nahin kar saka

kal raat hi jashn manane us ke dar par pahunch gaya

mere hathon mein surKH gulab the

aur bahaar ki KHush-bu

aankhon mein pyar tha

aur bahut se sawal

honTon par KHushiyon ke git the

aur thoDi si pyas

dil-ruba ke samne ek shama jal rahi thi

KHushi ke is mauqe par

Thik barah baje

us ne wahi kiya jo sal-girah manane wale karte hain

qatil adaon wali ne

be-niyazi se phunk mar ke

meri mohabbat ki shama gul kar di