میں کہاں تک تجھے صفائی دوں

میں کہاں تک تجھے صفائی دوں

خود کو الزام بے وفائی دوں

تجھ سے میں دشمنی شدید کروں

پیار بھی تجھ کو انتہائی دوں

اے مری جان گر اجازت ہو

زخم کو اذن لب کشائی دوں

زندگی تجھ کو اعتبار نہیں

اپنے ہونے کی میں گواہی دوں

مجھ کو خود میرے پاس لے آنا

میں تجھے گر کہیں دکھائی دوں

اک زمانہ ہے گوش بر آواز

اک زمانے کو میں سنائی دوں

وا کروں تجھ پہ منزل ادراک

پھر تجھے ذوق نارسائی دوں