Ifa-e-wada Aap Se Ai Yar Ho Chuka

ifa-e-wada aap se ai yar ho chuka

us ka to imtihan kai bar ho chuka

ahbab hath uThaen hamare ilaj se

sehat-pazir ishq ka bimar ho chuka

wo be-hisab baKHsh de ye baat aur hai

apne hisab mein to gunahgar ho chuka

main hath joDta hun baDi der se huzur

lag jaiye gale se ab inkar ho chuka

bechun kahan main apne dil-e-dagh-dar ko

sauda bura pasand KHaridar ho chuka

piri mein parwarish hai abas jism-e-zar ki

phenkun kisi ghaDi main ye bekar ho chuka

barham wo shoKH kyun na ho kyun zulf ko chhua

ye hath hathkaDi ke saza-war ho chuka

ab mujh se iltiyam ki baaten na kijiye

dil tum se phaT gaya jigar afgar ho chuka

mujh dil-figar ko na rahi tum se kuchh umid

ye KHatt-e-sabz marham-e-zangar ho chuka

darban ko salam karen ghar ki rah len

wo munh chhupa ke baiThe hain didar ho chuka

bande ke haal par nazar-parwarish rahe

husn-e-malih ka main namak-KHwar ho chuka

lun bosa KHun-baha main us abru-kaman se

ab to jigar se tir-e-nigah par ho chuka

ai 'bahr' ab to baat bhi karta nahin wo shoKH

wo rasm-o-rah ho chuki wo pyar ho chuka